Banna ein­­greiðslur til fé­lags­manna SGS

Samband íslenskra sveitarfélaga (SÍS) hefur greint sveitarfélögum landsins frá því að þeim sé með öllu óheimilt að greiða starfsmönnum sínum sem eru félagsmenn Starfsgreinasambandsins (SGS) eingreiðslu sem sambandið hefur farið fram á. Þetta kemur fram í tölvupósti sem SÍS sendi á sveitarfélögin og Fréttablaðið hefur undir höndunum.

Blátt bann við eingreiðslum

Aðrir starfsmenn sveitarfélaganna, sem ekki eru félagsmenn í SGS, fá hins vegar eingreiðsluna sem fylgir endurskoðun viðræðuáætlana í núverandi kjaradeilum. SGS hefur þannig vísað kjaradeilunum til ríkissáttasemjara og því segir SÍS að viðræðuáætlun þess væri þar með fallin úr gildi.

SÍS hefur nú sent ítrekunarpóst á öll sveitarfélögin þar sem þeim er greint frá því að þeim sé „óheimilt með öllu“ að greiða þessum starfsmönnum sínum umræddar eingreiðslur. Var þetta gert í kjölfar þess að SGS leitaði til sveitarfélaganna sjálfra eftir að SÍS neitaði að ræða slíka greiðslu við þau. Vísar sambandið þá í fullnaðarumboð sitt til kjarasamningagerðar fyrir hönd sveitarfélaganna í landinu.

„Í gangi er alvarleg kjaradeila við áðurnefnd stéttarfélög þar sem samninganefnd Sambands íslenskra sveitarfélaga stendur í eldlínunni við að verja gríðarlega fjárhagslega hagsmuni sveitarfélaganna,“ segir í póstinum. „Í þessu ljósi er afar mikilvægt að sveitarfélög sýni samstöðu og hafi ekki afskipti af kjarasamningagerðinni með framkvæmd eingreiðslu/innágreiðslu.“

Þá eru sveitarfélögin aftur minnt á umboð SÍS sem sveitarfélögin hafa gefið því. Það sé fullnaðarumboð og þeim sé ekki heimilt að hafa afskipti af kjarasamningagerð. Þá hafi sveitarfélögin skuldbundið sig til að hlíta markmiðum og stefnu sambandsins í kjaramálum og þeim kjarasamningum sem sambandið gerir fyrir þeirra hönd.

Kjörnum fulltrúum bannað að taka sjálfstæðar ákvarðanir

„Mér finnst þetta vera ótrúleg ósvífni hjá þeim,“ segir Björn Snæbjörnsson, formaður SGS í samtali við Fréttablaðið. „Að þeir skuli senda svona bréf frá sér þar sem þeir banna kjörnum sveitarstjórnarmönnum að taka sjálfstæðar ákvarðanir eins og þeir séu bara undir ægivaldi.“

Hann segir þá að það sé skrýtið að samtök sem séu stofnuð fyrir sveitarfélögin með hagsmuni þeirra í huga skuli senda sveitarfélögunum skilaboð af þessu tagi. „Þetta eru bara hálfgerðar hótanir, að það megi alls ekki verða við neinu því sem við vorum að fara fram á við þau,“ útskýrir hann.

SGS hafi þannig sent hvatningarbréf á öll sveitarfélögin þar sem þau voru hvött til að greiða þessum starfsmönnum sínum einnig greiðslurnar þrátt fyrir að félögin ættu í kjaradeilum við SÍS sem vildi ekki heimila þær. „Við vorum bara að höfða til sveitarstjórnarmanna með það að þeir væru ekki að mismuna starfsfólki sveitarfélaga eftir því hvort það væri í Starfsgreinasambandinu eða einhverju öðru sambandi,“ heldur Björn áfram.

„Þetta eru sveitarstjórnarmenn sem eru kosnir af íbúum sveitarfélaga og margir hverjir hafa lýst því yfir í kosningaundirbúningi að góðir starfsmenn og hæft starfsfólk sé það besta sem til sé í sveitarfélögunum. Svo á að neita þeim um þessar eingreiðslur,“ segir Björn.

„Ég trúi því ekki að sveitarstjórnarmenn vítt og breitt um landið ætli að láta múlbinda sig svona af samtökunum,“ segir Björn að lokum vongóður um að einhver sveitarfélög sjái sér fært að greiða greiðslurnar þrátt fyrir skilaboð SÍS.


Til baka